Сен11
Daily Archives: 11 сентября, 2017
Сен11
«Հետաքրքրաշարժ լեզվաբանություն». Մասի՞ս, թե՞ Մասիք
Մասի՞ս, թե՞ Մասիք
Հայերենում զգալի թիվ են կազմում այն բառերը, որոնք ծագումնաբանորեն ոչ թե բառերի ուղիղ ձևեր են, այլ հարացուցային թեք ձևեր, որոնք ժամանակի ընթացքում անկախացել են ինքնուրույն բառական արժեքով՝ պայմանավորված թեք ձևերում բառաքերական իմաստի մթագնմամբ:
Լեզվական այս իրողությունը մենք, թերևս, էլի կանդրադառնանք:
Այնուամենայնիվ, Մասիս անվանումն արդյոք բառի ուղիղ ձևն է, թե՞ նրա թեքված ձևերից մեկը: Եթե թեք ձև է, ապա ո՛րն է նրա ուղիղ ձևը՝ ուղղական հոլովը:
Նախ լսենք Գողթան երգիչներին.
Երբ դու յորս հեծեցիս յԱզատն ի վեր ի Մասիս,
Զքեզ կալցին քաջք, տարցին յԱզատն ի վեր ի Մասիս,
Անդ կայցես և զլոյս մի՛ տեսցես:
Մեզ համար Ազատն Մասիս բառակապակցությունը բաղադրյալ անվանում է, իսկ Մասիս՝ ուղիղ ձև: Բայց արդյո՞ք:
Անեկբա է, Մասյաց աղավնի, Մասյաց զեփյուռ կապակցությունները Մասյաց /Մասեաց/ բաաձևը թեք ձև է, ո՛րն է, ուրեմն, նրա ուղղական հոլովը: Տրամաբանական է՝ Մասիք ուղղականը, որպես անեզական հոլովը: Հակադարձ վերականգնման օրենքով կարող ենք ասել՝ բարեաց բառաձևի ուղղական է՝ բարիք, բաղնիք և այլն: Ըստ գրաբարի հոլովական համակարգի տրամաբանության , հոգնակի սեռականում — /ե/ աց մասնիկ ստացող բառերը հոգնակի ուղղականում ունեցել են –իք ածանցը: Այդ կարգի բառերը հոգնակի հայցականում ստանում են-ս վերջնամասնիկը. Բարիք-/զ/ բարիս, կարծիք — /զ/ կարծիս, բաղանիք — /զ/ բաղանիս /բաղիս/, հետևաբար՝ Մասիք /զ/ Մասիս: Ուրեմն՝ Մասիս բառը ծագում է Մասիք անեզական գոյականի հոգնակի հայցականից՝ հոլովաձևերի քերականական իմաստի մթագնման ուղիով:
Արդյո՞ք այս օրինակը եզակի է: Իհարկե, ոչ:
Ժամանակակից հայերնի չորս թվականը ծագում է գրաբարի հոգնակի հայցականից ՝ չորս /զ/ չորս, նույն ուղիով են առաջացել ՝ երկուս /երկուք/, ավետիս /ավետիք-աւետիք/, /ծախս-ծախք/, դուրս /դուրք/ բառերը և այլն:
Վերադառնանք Մասիս բառին. Հայերնում –իս /մասնիկը/ գոյականական բառակազմանկան ձևույթ չէ. Հետևաբար այն հատկանունները, որոնցում առկա է այդ հնչունախումբը , ուղղականում ունեցել են — /են/ իք ածանցը. Արդյո՞ք այդ ուղիով չեն առաջացել Թեղենիս, Վարդենիս, Կեչառիս նախնական ձևերից:
Ի վերջո, Մասի՞ս , թե Մասի՞ք: Մասիս. Քանի որ վաղուց ի վեր այդ ձևը վերաժեքավորվել է որպես բառի ուղիղ ձև, որպես ելակետային միավոր:Իսկ նրա նախնական ձևի վերականգնումը լեզվի պատմության մասնագետների խնդիրն է. Նման կարգի բացահայտումները տարածվում են բառերի ամբողջական շարքերի վրա: